कैलालीको टिकापुर हत्याकाण्डका मुख्य अभियुक्त रेशम चौधरी सहित ११ जनालाई जन्मकैदको फैसला भएको छ । आज जिल्ला अदालत कैलालीका न्यायाधीश परशुराम भट्टराईको एकल इजलासले यस्तो फैसला सुनाएको हो ।

७ भदौ २०७२ मा टिकापुरमा भएको थारुवान र अखण्ड सुदुरपश्चिमको आन्दोलनका क्रममा एक नाबालक र ८ सुरक्षाकर्मीको मृत्युभएको थियो । मुद्दाका ५८ प्रतिवादीमध्ये २७ जना थुनामा छन् । बाँकी ३१ जना फरार छन् ।

फरार रहेकै अवस्थामा गत आम निर्वाचनमा कैलाली निर्वाचन क्षेत्र नम्बर १ बाट चुनाव जितेका रेशम चौधरीलाई १९ पुसमा सांसदको सपथ गराइएको छ । चौधरी अहिले पनि डिल्लीबजारस्थित कारागारमै रहेको छन् ।

चौधरीसँगै हरिनारायण चौधरी, राजकुमार कठरिया, सुन्दरलाल कठरिया, बृज मोहन डगौरा, राजेश चौधरी, विरबहादुर चौधरी, प्रदीप चौधरी, विद्रोह भनिने सिताराम चौधरी, श्रवण चौधरी, गंगाराम चौधरीलाई पनि जन्मकैद फैसला भएको छ ।

उनीहरुमध्ये श्रवण चौधरी नावालक रहेकाले उनलाई १० वर्ष कैद सजाय हुने छ । अदालतले अन्य १२ जना प्रतिवादीलाई तीन वर्ष र एकजना छ महिना कैद सुनाएको छ ।

छ महिना कैद फैसला हुनेहरुमा लक्षण थारु, लाहुराम चौधरी, रामकुमार कठरिया, सन्तराम चौधरी, जीतबहादुर डगौरा, प्रेमबहादुर चौधरी, किशानलाल चौधरी, दिलबहादुर चौधरी, सन्तोष थारु चौधरी, विश्राम चौधरी, चुन्नीराम चौधरी र रामप्रसाद चौधरी छन् ।

उनीहरुमध्ये चुन्नीराम बाहेकले कैद भुक्तानी गरीसकेकोले आजै थुनामुक्त हुने छन भने चुन्नीरामको ३० फागुनमा छ महिना कैद पुग्नेछ । –साभार : हिमाल खबर