काठमाडौँ । खेल सकिन तीन मिनेट बाँकी हुदाँ क्रिस्टियानो रोनाल्डोको उत्कृष्ट गोलले रियल मड्रिडलाई हारबाट जोगाएको छ ।
बुधबार राति भएको ‘स्पेनिस ला लिगा’ खेलमा रोनाल्डोले ८७ औं मिनेटमा उत्कृष्ट गोल गरेपछि रियल मड्रिडले बिलबाओसँग १-१ गोलको बराबरी गर्न सफल भयो ।
बिल्बाओले घरेलु मैदानमा १४ औं मिनेटमा अग्रता लिएको थियो । इनाकी विलियम्सले उत्कृष्ट चिप गोल गर्दै टोलीलाई अगाडी बढाए । दोस्रो हाफमा राउल गार्सियाले प्रहार गरेको सट क्रसबारमा लग्नु घरेलु टोलीको लागि दुर्भाग्य रहयो ।
गोल फर्काउन अन्तिम समयसम्म रियल मड्रिडलाई संघर्ष गर्नुपर्यो । ८७ औं मिनेटमा रोनाल्डोले गोल गरेपछि रियल हारबाट जोगियो । लुका मोड्रिकले गरेको प्रहार क्रसबारमा लागेर फर्किएको बललाई रोनाल्डोले जाली चुमाएका थिए ।
लिगमा रियलले ३३ खेलमा ६८ अंक जोडेको छ । दोस्रो स्थानमा रहेको एटलेटिकोले ३२ खेलमा ७१ अंक बनाएको छ र आज रियल सोसीडाडविरुद्ध उत्रने तयारीमा छ । लिगको शीर्षस्थानमा रहेको बार्सिलोना ३३ खेलमा ८३ अंकसहित लिग उपाधि नजिक पुगिसकेको छ ।
