नेत्र शाही/उज्यालो । जुम्ला, असोज ४ – जुम्लाका बमबहादुर बुढाले पहिलो संविधानसभाको चुनावदेखि नकाटेको दाह्री संबिधान घोषणा भएपछि काट्नुभएको छ । बुढाले पहिलो संविधानसभाको चुनाव २०६४ चैत २८ गतेदेखि नै दाह्री पाल्न सुरु गर्नुभएको थियो । उहाँले झण्डै साढे सात वर्षपछि दाह्री काट्नुभएको हो ।

शनिगाउँ–८ जोडु निवासी शिक्षक बुढाले संविधान बनेपछि सोमबार बिहान ८ बजे जिल्ला प्रशासन कार्यालय अगाडि पत्रकार सम्मेलन गरी ३० सेन्टिमिटर लामो दाह्री काट्नुभएको हो । बमबहादुरले दाह्री काटेको हेर्न स्थानीय बासिन्दाको ठूलो जमघट भएको थियो ।बुढाको दाह्री काट्ने समय निकै ठूलो उत्सव जस्तै भएको थियो । उहाँले पहिलो संविधानसभाको चुनावदेखि नेपालको नयाँ संविधान नआउँदासम्म दाह्री नकाट्ने प्रतिबद्धताका साथ दाह्री पाल्नुभएको थियो ।

‘दाह्री काटेपछि मलाई हल्का र शान्त महसुस भएको छ त्यस्तै मुलुकमा पनि स्थायी शान्ति होस्’ बुढाले भन्नुभयो । जुम्लामा लामो समयदेखि सैलुन सञ्चालन गरिरहेका रामप्रित ठाकुरले बमबहादुरको दाह्री काट्नुभएको हो । ३६ वर्षका बमबहादुर बुढा एक प्राथमिक विद्यालयको शिक्षक हुनुहुन्छ । उहाँका विद्यार्थीहरु लामो दाह्री  देखेर डराउँथे । नयाँ भर्ना हुन आएका विद्यार्थीसँग घुलमिल हुन उहाँ चकलेट, बिस्कुट दिने गर्नुहुन्थ्यो । विद्यार्थीहरु माझ उहाँले ‘दाह्री सर’ को उपमा पाउनुभएको थियो । अब दाह्री सरको दाह्री रहेन  । तर उहाँ आफूले लिएको अठोट पूरा गर्न सकेकोमा खुशी हुनुहुन्छ ।

उहाँको लामो दाह्री देखेर छिमेकीहरु यो उमेरमै कस्तो जोगी जस्तो भएको होला भन्थे । पहिलो संंविधानसभाले संबिधान दिन नसक्दा अब दाह्री काट भनेर छिमेकीहरु सुझाव दिन्थे । तर बमबहादुरलाई संबिधान नबनि दाह्री नकाट्ने अठोट त्याग्न मन लागेन । ‘त्यतिबेला मलाई धेरैले दाह्री काट भने, तर मलाई आफूले गरेको संकल्प यत्तिकै छाड्न मन लागेन । अवश्य नै देश अन्धो हुने छैन, संविधान अवश्य आउँछ भन्ने सोचेर कत्तिपनि आत्तिन’ बुढाले भन्नुभयो ।