लगातारको बन्दका कारण बाँकेमा व्यापारीले ठूलो घाटा ब्यहोर्नु परेको छ । यो अवधिमा झण्डै एक अर्ब रुपैयाँ भन्दा बढीको व्यापार घाटा भएको नेपालगन्ज उद्योग बाणिज्य संघका अध्यक्ष कृष्णप्रसाद श्रेष्ठले बताउनुभयो ।
चाडपर्व नजिकिएको बेला भएको बन्दका कारण व्यापारीहरुले बढी घाटा खेप्नु परेको छ । बाँकेमा दैनिक पाँच करोडभन्दा बढीको कारोवार हुने गरेको वताइएको छ ।
बाँकेमा संयुक्त लोकतान्त्रिक मधेसी मोर्चा रहेको संयुक्त थरुहट मधेस संघर्ष समिति र थारु संघसंस्था रहेको संयुक्त थरुहट संघर्ष समितिले तीन हप्तादेखि बन्द जारी राखेका छन् ।
बन्दका कारण नेपालगन्जमा रहेका साना ठूला गरी ६ हजार उद्योगी व्यवसायी मर्कामा परेका छन् ।
यसैबीच, वन्द अवज्ञा गरेको बन्दै आन्दोलनकारीहरुले बाँकेको कोहलपुरमा दुईवटा सवारी साधनमा तोडफोड गरेका छन् ।
लु १ ख ९२२२ नम्वरको बस र ना ३ ख ४२७७ नम्वरको फोर्समा बन्दकर्ताहरुले तोडफोड गरेको इलाका प्रहरी कार्यालय कोहलपुरले जनाएको छ ।
सुर्खेतबाट नेपालगन्ज आउँदै गरेका गाडीलाई हिजो साँझ कोहलपुरको चौराह नजिकै आन्दोलनकारीले तोडफोड गरेका प्रहरीले जनाएको छ ।
