काठमाडौँ, साउन १८, रुसको कजानमा जारी १६औँ विश्व पौडी च्याम्पियनसिपमा नेपाली टोलीले पहिलो सफलता हात पारेको छ ।
नेपाली टोलीकी सदस्य गौरिकाले एकसय मिटरको ब्याक स्ट्रोक पौडीमा पहिलो स्थान हात पारेकी हुन् । उनले विश्वका पाँच देशका खेलाडीलाई पछि पार्दै प्रथम स्थान हासिल गरेकी हुन् ।
बेलायतको लण्डनमा प्रशिक्षण गरेर प्रतियोगितामा भाग लिन रुस पुगेकी गौरिकाले नेपाललाई पहिलो सफलता दिलाएकी हुन् । साउन ८ देखि सुरु भएको पौडी खेल २४ गतेसम्म सञ्चालन हुनेछ ।
उक्त प्रतियोगितामा नेपालका तर्फबाट गौरिकासँगै शिरिष गुरुङ, किरण कार्की, र सोफिया शाहले प्रतिस्पर्धा गर्दैछन् । नेपाली टिमका व्यवस्थापक वासुदेव निरौलाका अनुसार प्रतियोगितामा शिरिषले ५० र एक सय मिटरको फ्री स्टाइलमा प्रतिस्पर्धा गर्नेछिन् भने किरणले ५० र सय मिटको ब्रेस्ट स्ट्रोक, सोफियाले ५० र २०० मिटरको फ्री स्टाइलमा प्रतिस्पर्धा गर्नेछन् । गौरिकाले अब एकसय मिटरको फ्री स्टाइल प्रतिस्पर्धा गर्नेछिन् ।
नेपाली टोली विश्व पौडी च्याम्पियनसिप खेल्न साउन १२ गते त्यसतर्फ प्रस्थान गरेको थियो ।
