अमेरिकाकी काइली जेनर आफ्नै बलबुतामा अहिलेसम्मकै संसारको सबैभन्दा कान्छी अर्बपति बन्नुभएको छ ।

फोब्र्स म्यागजिनले सार्वजनिक गरेको सन् २०१९ को अर्बपति सूचिमा पर्नुभएकी २१ वर्षीया जेनरले आफ्नो भाग्य शृङ्गारका सामानको व्यवसायबाट कोर्नुभएको हो ।

उहाँको कम्पनी काइली कस्मेटिक्सले गत वर्ष मात्र आफ्नो बिक्रीबाट ३६ करोड अमेरिकी डलर बराबरको आम्दानी गरेको थियो । उहाँ चर्चित कार्ड्याशियन परिवारकी सदस्य हुनुहुन्छ ।

एक्काइस वर्षमै अर्बपतिको सूचीमा पर्दा उहाँले फेसबुकका संस्थापक मार्क जुकर्बर्गलाई पनि उछिन्नुभएको छ । कान्छा अर्बपतिका रूपमा सूचीकृत हुँदा जुकर्बर्ग २३ वर्षका हुनुहुन्थ्यो ।

सन् २०१९ को सूचीमा १ सय ३१ अर्ब अमेरिकी डलर सम्पत्ति सहित अमेजनका संस्थापक जेफ बेजोस शीर्ष स्थानमा रहनुभएको छ । उहाँको कुल सम्पत्ति गत वर्षको भन्दा १९ अर्ब अमेरिकी डलरले बढेको छ ।

तर फेसबुकका मार्क जुकर्बर्गको सम्पत्ति भने घटिरहेको छ । फोब्र्स सूचीका अनुसार गत वर्ष रहेको उहाँको सम्पत्ति ६२ दशमलव ३ अर्ब अमेरिकी डलर रहेकोमा यो वर्ष त्यो ८ दशमलव ७ अर्ब डलरले घटेको छ ।

फेसबुकले गोपनीयता सम्बन्धी प्रकरणहरूमा सङ्घर्ष गरिरहँदा एकचोटि जुकर्बर्गको शेयरको मूल्य एकतिहाइले घटेको थियो । उता अमेजनको शेयरको मूल्य बढ्दा त्यसका संस्थापक बेजोसको ब्याङ्क खाता बढाएको छ र दोस्रा धनी बिल गेट्ससँगको दूरी थोरै बढाएको छ ।

माइक्रोसफ्ट संस्थापक गेट्सको सम्पत्ति चाहिँ ९० अर्ब डलरबाट बढेर ९६ दशमलव ५ अर्ब डलर पुगेको छ । फाब्र्सको गणनामा परेका दुई हजार एक सय ५३ धनी व्यक्तिमध्ये २ सय ५२ जना महिलाहरू छन ।

आफ्नै पौरखमा सबैभन्दा धनी महिला भने चीनकी प्रभावशाली घरजग्जा व्यवसायी वू याजुन हुनुहुन्छ । उहाँको सम्पत्ति झन्डै ९ दशमलव ४ अर्ब डलर रहेको बताइन्छ ।

आफ्नै प्रयासमा अर्बपति हुने त्यस्ता महिलाको सङ्ख्या पहिलो पटक सबैभन्दा धेरै ७२ पुगेको छ जुन गतवर्ष ५६ थियो । सबैभन्दा धेरै अर्बपति अमेरिकाका ६ सय ७ जना छन् भने त्यसपछि चीनका ३ सय २४ जना छन ।

यता नेपालका विनोद चौधरी अर्बपतिहरूको सूचीमा १ हजार ३ सय ४९ औँ स्थानमा हुनुहुन्छ । फोब्र्स म्यागजिनले यस वर्ष पनि उहाँलाई मात्र नेपाली अर्बपतिका रूपमा सूचीकृत गरेको छ ।

उहाँको स्वामित्वमा १ दशमलव ७ अर्ब डलर बराबरको सम्पत्ति रहेको फोब्र्सले उल्लेख गरेको छ । उहाँको व्यवसाय खाद्य पदार्थ, विद्युतीय सामग्री, बियर र होटलको क्षेत्रमा रहेको छ । ब्याङ्किङमा पनि उहाँको सहभागिता छ ।

उहाँ सन् २०१३ देखि फाब्र्सको सूचीमा पर्दै आउनुभएको छ ।

-साभार : बिबिसी नेपाली