काठमाडौं : नेपाल कम्युनिष्ट पार्टीले आब्हान गरेको नेपाल बन्दको प्रभाव राजधानीमा खासै नदेखिएपनि राजधानीबाहिर बन्दकर्ताले सवारीआवागमन र दैनिक प्रशासनिक कामकाजमा अवरोध गरेका छन ।

भारतीय प्रधानमन्त्री नरेन्द्र मोदीको नेपाल भ्रमणक्रममा सरकारले राष्ट्रघात र जनताको स्वाभिमानमाथि कुठाराघात गरेको जनाउँदै नेकपाले आईतबारका लागि बन्द आब्हान गरेको छ ।

बन्दलाई कडाईका साथ कार्यान्वयन गर्न महासचिव विप्लवले निर्देशन दिएपछि बन्दकर्ताले देशैभर विरोध प्रदर्शन र बन्द अवज्ञा गर्नेमाथि आक्रमण गरेका छन । यातायात सेवामा अवरोध हुँदा यात्रुहरुलाई गन्तव्यसम्म पुग्न सकस परेको छ ।

भरतपुरमा बिहानै विस्फोट
नेकपाका कार्यकर्ताले चितवनको भरतपुर ओरालोस्थित रोयल सेन्चुरी होटल र भाटभटेनी सुपरमार्केटको बीचमा आज बिहान ३ बजेट ४५ मिनेट जाँदा बम विस्फोट विस्फोट गराएको चितवन प्रहरीले जानकारी दिएको छ ।

विस्फोटका कारण मानवीय क्षति नभएपनि सुपरमार्केटको सिसा फुटेको छ । चितवन गृहमन्त्री रामबहादुर थापा बादलको गृहजिल्ला हो ।

लगातार आगजनी
नेकपाका कार्यकर्ताले आईतबार विहान केही स्थानमा सवारीसाधनमाथि लगातार आगजनी गरेका छन । बीरगञ्जस्थित बसपार्कमा ग १ ख ३१४७ नम्बरकोउ यात्रुबाहक बसमा आगजनी गरिएको छ । बस पूरै जलेको छ ।

यसैगरि, धादिङको धुनिबेशी–६, चालिसेमा बजारमा पनि नेकपाका कार्यकर्ताले दुईवटा भारतीय गाडी जलाईदिएका छन । आरजे ४२ जिए ५०२१ र आरजे ४२ जिए ०७५६ नम्बरको २२ चक्के भारतीय नम्बर प्लेटको दुईवटा कन्टेनरमा नेकपाका कार्यकर्ताले आगो लगाउँदा ट्रक जलेर ध्वस्त भएको जिल्ला प्रहरी कार्यालयका प्रहरी उपरीक्षक रामबहादुर केसीले जानकारी दिएका छन ।

ट्रकमा लगाईएको आगो नियन्त्रण गर्न काठमाडौंबाट दमकल लगिएको थियो ।

मोरङमा शंकास्पद बस्तु, आवागमन अवरुद्द
मोरङको सुन्दरहरैँचा नगरपालिकाको दुलारीमा पनि शंकास्पद बस्तु फेला परेको प्रहरीले जानकारी दिएको छ । पूर्व–पश्चिम राजमार्गको बीच सडकमै भागमा दुईवटा वट्टामा पहेँलो टेपले बेरेर तार निकालिएको अवस्थामा शंकास्पद वस्तु फेला परेको मोरङ प्रहरीले जनाएको छ ।

शंकास्पद बस्तु हटाउन अहिले घटनास्थलमा नेपाली सेनाको बम डिस्पोजल युनिट खटाईएको छ । यो बस्तु नेकपाका कार्यकर्ताले राखेको हुनसक्ने प्रहरीले अनुमान गरेको छ ।