काठमाडौं । निर्वाचन आयोगले बारा क्षेत्र नम्बर ४ मा प्रतिनिधिसभा सदस्यका लागि नेकपा (एकीकृत समाजवादी) का उमेदवार कृष्णकुमार श्रेष्ठ र सोही क्षेत्र ४ (२)का लागि प्रदेशसभा सदस्यका लागि लोकतान्त्रिक समाजवादी पार्टी (लोसपा)का उमेदवार जितेन्द्र सोनललाई स्पष्टीकरण सोधेको छ ।
निर्वाचनको मौन अवधि सुरु भइसकेको अवस्थामा प्रचारप्रसार जारी राखेको भन्दै आयोगले स्पष्टीकरण सोधेको हो ।
दुवैजनलाई एकै व्यहोराको पत्र लेख्दै आयोगले भनेको छ, “तपाईंहरूबाट निर्वाचन आचारसंहिता विपरीतका काम भए । तपाईंलाई निर्वाचन आयोग ऐन, २०७३ को दफा २३ को उपदफा (३) र (४) बमोजिमको कारबाही नहुनु पर्ने कारण के छ ?”
आयोगले पत्र प्राप्त भएको समयले १२ घण्टाभित्र आयोगको इमेल ठेगाना वा जिल्ला निर्वाचन कार्यालय बारामा प्राप्त हुने गरी लिखित स्पष्टीकरण पेस गर्न भनेको छ ।
