बाँकेमा जारी राष्ट्रिय युवासंघको नवौं राष्ट्रिय महाधिवेशनस्थलमा बन्दुकसहित देखिएका गणेशबहादुर बोगटीलाई प्रहरीले पक्राउ गरेको छ ।
सार्वजनिक भएको भिडिओमा बन्दुक बोकेर नेकपा एमाले निकट डन मिलन चक्रेको सुरक्षा दिएको जस्तो देखिन्छ । उक्त भिडिओ आइतबारको हो ।
महाधिवेशनस्थलमा बोगटी बन्दुकसहित देखिएको सार्वजनिक भएपछि उनलाई सोमवार राती पक्राउ गरिएको प्रहरीले जनाएको छ ।
प्रहरीले उनीबाट हतियार पनि बरामद गरेको छ । हतियार अनुमति प्राप्त भएपनि खुलेआम लिएर हिँड्न नपाइने भएकाले उनलाई पक्राउ गरिएको प्रहरीले जनाएको छ ।
बाँके प्रहरीले पक्राउ परेका बोगटीलाई कुन मुद्दा चलाउने बारेमा प्रमुख जिल्ला अधिकारीसँग समन्वय गरिरहेको जनाएको छ ।
