भारतका दुई जना युवा काठमाडौं–१८ नरदेविस्थित एक घरमा भाडामा बस्दै आए थिए । पाँचतले घरको पहिलो तल्लामा भाडामाबस्दै आएका उनीहरूले सुनका गरगहना बनाउने काम गर्थे ।

२९ कात्तिक ८ बजे दुवै जना आफ्नै कारखानामा सुन बनाउने काममा ब्यस्त थिए । एकाएक उनीहरू काम गर्दै बसेको ठाउँमा ६ जनाको समूह टुप्लुक्क आइपुग्याे ।

त्यसमध्ये एक जना प्रहरीको पोशाकमा थिए । कम्मरमा पेस्तोलसमेत भिरे ।

प्रहरी पोशाका ठाँटिएका तिनै युवाले सुनको काम गरिरहेका युवालाई भने, ‘तपाइँको पसलमा रहेका सुनका गहनाका बिलहरू छैनन् भन्ने सूचना छ । हामी हनुमानढोका प्रहरी कार्यालयबाट आएका प्रहरी हौँ । यो सुन हामी लिएर जान्छौँ बिल छ ? पछि कार्यालयमा आउनु होला ।’

सुन ब्यवसायी युवा छाँगाबाट खसेझै भए । प्रहरीको पोशाक र पेस्तोल नै भिरेका युवाहरू प्रहरी होइनन् भन्ने उनीहरूले शंकासमेत गरेका थिएनन् । प्रहरी हुँ भन्दै आएका युवाहरू करिब २० तोला सुना लिएर हिँडे ।

विपत्‌मा परेका उनीहरूलाई लाग्यो प्रहरी भए हामीलाई पनि पक्राउ गर्नुपर्ने किन छोडेर हिँडे ? शंका गर्न थाले । उनीहरू आफैँ प्रहरी वृत्त जनसेवा पुगे ।

घटनाबारे प्रहरीलाई खबर गर्दा उनीहरू लुटेरा रहेको खुल्यो । घटनापछि काठमाडौं प्रहरीको टोलीले लुटेरा समूहमाथि अनुसन्धान थाल्यो ।
प्रहरीको अनुसन्धानबाट घटनामा संलग्न रहेको आरोपमा पाँचजनालाई पक्राउ गरेको छ । उनीहरूलाई बुधबार पक्राउ गरेको काठमाडौं प्रहरीका प्रमुख एसएसपी भरत बहादुर बोहराले जानकारी दिए ।

पक्राउ पर्नेहरूमा धनकुटा सागुरिगढी गाउँपालिका–७ का सुमन राई, सोहीका देविराज राई, धादिङ त्रिपुरासुन्दरी गाउँपालिका–६ का कुमार विश्वकर्मा, सोही स्थानका बेगबहादुर विक र धादिङ खनियाबास–४ का मनिला तामाङछन् ।

उनीहरूको साथबाट प्रहरीले पेस्तोल र त्यसको म्याग्जिन र ४ राउण्ड गोली बरामद गरेको छ । त्यस्तै उनीहरूको साथबाट प्रहरीले केही सुन र लागुऔषध फेनारगन, डाइजेपाम र नुफिन गरेर पाँच सय ९१ एम्पुल बरामद गरेको छ ।

एकजना भने अझैँ फरार रहेका छन् । पक्राउ परेकाको बयानका आधारमा धादिङका राजेश राई फरार भएका छन् । प्रहरीको अनुसन्धानबाट पेस्तोल र प्रहरीको पोशाक ब्यवस्थापनको काम फरार रहेका राईले गरेको खुलेको छ ।
प्रहरीको अनुसन्धानबाट प्रहरीको पोशाक र सुमन राईले लगाएको खुलेको छ । उनीहरूलाई बिहीबार काठमाडौं प्रहरीले पत्रकार सम्मेलन गरेर सार्वजनिक गरेको छ । उनीहरूमाथि प्रहरीले थप अनुसन्धान गरिरहेको एसएसपी बोहराले जानकारी दिए ।

उनीहरूमाथि प्रहरीले मुलुकी अपराध संहिता, २०७४ को परिच्छेद–२० को चोरी तथा डाँकासम्बन्धी कसुर मुद्दामा चलाएर अनुसन्धान थालेको छ ।