नेपालगन्जको प्रसिद्ध शक्तिपिठ बागेश्वरी मन्दिर परिसरमा रहेको जुंगे महादेव जाने मन्दिर जीर्णोद्वार सुरु भएको छ। बुधबार विधिवत पुजाअर्चना गरेर महादेव मान्दिर जाने पुलको जीर्णोद्वार सुरु गरिएको हो। नेपालगन्ज उपमहानगरपालिकाले हालको मन्दिरको स्वरूप नबिगारी पुल तथा मन्दिरको मर्मतसम्भारका लागि यसअघि नै टेण्डर आव्हान गरेको थियो । ग्रेटर नेपाल कन्स्ट्क्सनले गत फागुन ३ गते सम्झौता गरेर आगामी २०८० चैत्र १ गतेसम्म जीर्णोद्वारको सम्झौता गरेको छ। ‘शुभ साइत जुराएर काम सुरु गरिएको छ’, इन्जिनियर दिनेश थापा मगरले भने ।
नेपालगन्ज नगर प्रमुख प्रशान्त विष्टले महादेव मन्दिर तथा पुलको संरचना जीर्ण हुँदा भक्तजनहरू समेत जोखिममा पर्ने भएकाले चालु आर्थिक वर्षभित्रै जीर्णोद्वार हुने गरी काम अगाडि बढाउने यसअघि नै बताएका थिए। उनले त्यसका लागि पहल लिंदै बजेट विनियोजन गरेका थिए । यसअघि जुँगे महादेव मन्दिरसम्म पुग्ने पुल जीर्ण भएपनि पटक-पटक बनाउने प्रयास बेवास्ताका कारण सफल हुन सकेको थिएन । तत्कालीन पुनरावेदन अदालत बाँकेले २०७३ असार २२ मा एउटा आदेशमा जुँगे महादेव जाने जीर्ण पुलको पुन:निर्माण गर्न आदेश समेत दिएको थियो ।
बागेश्वरी मन्दिर क्षेत्रमा रहेको खडेश्वर (जुंगे) महादेवको मन्दिर तलाउको बीचमा रहेकाले पुलबाट आवातजावत हुने गर्दछ। संघ, प्रदेश र स्थानीय तहले बागेश्वरी मन्दिरलाई धार्मिक पर्यटकीय गन्तव्यको सूचिमा अग्र स्थानमा राख्छन्। मान्दिर नेपालगन्जको सर्मृद्धको एउटा आधार बन्न सक्ने पनि संघ, प्रदेशका मन्त्री देखि स्थानीय तहका जनप्रतिनिधि, पयर्टन ब्यवसायी लगायतबाट औपचारिक कार्यक्रममा धारणा सार्वजनिक हुँदै आएको छ।
संघीय सरकारले नेपाल भ्रमण बर्षमा सय गन्तव्यको सूचि जारी गर्दा नेपालगन्जको बागेश्वरी मन्दिरलाई पनि राखेको थियो । प्रदेश सरकारले पनि धार्मिक पर्यटक आकर्षित गर्न सकिने क्षेत्रका रूपमा बागेश्वरीलाई राखेको छ। तर, मन्दिरको विकासमा ठूला योजना न त संघ, न प्रदेश र न स्थानीय तहले ठोस ठूला योजना ल्याउन सकेका छैनन्। मन्दिरको पुलका लागि मन्दिर व्यवस्थापन समिति, संघ र प्रदेश सरकारले चासो नदेखाएपाछि उपमहानगरपालिका आफैले त्यसको निर्माण थालेको हो।
