साफ महिला यू–२० च्याम्पियनशिप फुटबलको फाइनल खेल आज हुँदैछ। आज फाइनलमा नेपाल र आयोजक बंगलादेश भिड्दै छन् ।
बंगलादेशले ढाकास्थित वीर श्रेष्ठ शहीद सिपाही मुस्तफा कमल स्टेडियममा आज साझँ पौने ७ बजेदेखि सुरु हुने उक्त फाइनल भिडन्तले नेपाललाई उपाधि दिलाउन सक्छ । गत मंगलबार नेपालले भारतलाई ३–१ ले हराएर फाइनल प्रवेशको ऐतिहासिक मौका पाएको थियो ।
गत मंगलबार सम्पन्न लिग चरणको अन्तिम खेलमा भुटानलाई ५–० ले पराजित गर्दै बंगलादेशले फाइनलमा स्थान सुरक्षित गरेपछि फाइनलमा नेपाल र बंगलादेश भिड्न लागेका हुन् ।
यस जितसँगै तीन खेलमा ७ अंक जोडेको बंगलादेश शीर्ष स्थानमा छ भने ३ खेलमा पराजय ब्यहोरेको भुटान अंकविहीन हुँदै बाहिरिए पछि बंगलादेश फाइनलमा पुगेको हो ।
भुटानसँग बंगलादेशको यो जितसँगै भारत बाहिरिनु परेको थियो । भारतले तीन खेलमा ४ अंक जोडे पनि फाइनलमा प्रवेश गर्न भने पाएन। नेपाल ६ अंकसहित फाइनलमा पुगेको हो । नेपालले भारत र भुटानलाई हराउँदा बंगलादेशसँग पराजित भएको थियो ।
भारतलाई हराएर आएको नेपाल र भुटानलाई हराएर फाइनलमा पुगेको आयोजक टोली बंगलादेशबीचको खेल रोमाञ्चक हुने अनुमान गरिएको छ ।
