नागरिक उड्डयन प्राधिकरणले वायु सेवा कम्पनीहरूलाई हवाई भाडादर घटाउन निर्देशन दिएसँगै भाडा घटेको छ ।
नेपाल आयल निगमले हवाई इन्धनको मूल्य प्रतिलिटर १० रूपैयाँ घटाएपछि प्राधिकरणले आन्तरिक उडानतर्फको हवाई भाडा घटाउन निर्देशन दिएको हो । नयाँ भाडादर आजदेखि (चैत २२) लागू हुने भएको छ ।
भाडा घटेसँगै सबभन्दा धेरै काठमाडौं- धनगढीको भाडा दर ४४० रूपैयाँ घटेको छ । त्यस्तै सबभन्दा कम काठमाडौं- सिमराको ९० रूपैयाँ भाडा घटेको छ । नयाँ भाडादर अनुसार काठमाडौं माउन्टेन फ्लाइटको भाडा ३४५ रूपैयाँ घटेको छ ।
त्यस्तै, काठमाडौं–भद्रपुर भाडा ३ सय रूपैयाँ, काठमाडौं–विराटनगर २४०, काठमाडौं–जनकपुर १३० रूपैयाँ, काठमाडौं–भरतपुर १०५ रूपैयाँ, काठमाडौं–पोखरा १५५ रूपैयाँ घटेको छ ।
यस्तै काठमाडौं–भैरहवा २०५, काठमाडौं–नेपालगञ्जको भाडादर ३२५ रूपैयाँ, काठमाडौं–धनगढीको ४४० रूपैयाँ, काठमाडौं–तुम्लिङटारको १८५ रूपैयाँ, काठमाडौं–सिमराको ९० रूपैयाँ, काठमाडौं–सुर्खेत ३४५ रूपैयाँ, काठमाडौं–राजविराज २०५ रूपैयाँ घटाइएको हो ।
