महेन्द्र बहुमुखी क्याम्पस नेपालगञ्जको स्ववियु सभापतिमा अनेरास्ववियुका माधव खत्री निर्वाचित भएका छन् । खत्रीले नेतृत्व गरेको संयुक्त प्यानल सबै पदमा निर्वाचित भएको छ । खत्री ७५६ मतका साथ स्ववियु सभापति चुनिएका हुन् । खत्रीले नेपाल बिद्यार्थी संघबाट सभापतिका उम्मेदवार जीवनराज सुवेदीलाई पराजित गरेका हुन् । सुवेदीले ६६६ मत प्राप्त गरे । स्ववियु सभापतिमा ५ जनाको प्रतिष्पर्धा थियो ।

सचिवमा पनि संयुक्त प्यानलकै हरेन्दबहादुर विक ९७६ मतका साथ विजयी हुँदा निकटतम् प्रतिद्वन्दी नेविसंघका नर्देव थारुले ६५६ मत पाएका छन् । यस्तै कोषाध्यक्षमा भरतराज बुढथापा ८७७ मत ल्याएर निर्वाचित भएका छन् । उनका प्रतिद्वन्दी नेविसंघका देवी रेग्मीले ७३९ मत पाइन् । सदस्यहरुमा पनि संयुक्त प्यानलका सुरेन्द्र रावल, पंकज सिजापति, टेकराज कँडेल, चिरञ्जिवी बुढा, निराजन अवस्थी, सुशिल बर्मा, सरस्वती बुढा मगर र महेश शर्मा निर्वाचित भएको निर्वाचन संयोजक ठण्डीराज जमरकट्टेले जानकारी दिए ।  

नेविसंघले नागरिक उन्मुक्ति पार्टीको विद्यार्थी संगठनसंग तालमेल गर्दा बाँकी सबै विद्यार्थी संगठन अनेरास्ववियुसंग संयुक्त गठबन्धनमा थिए । समानुपातिकतर्फ भने नेविसंघले सबैभन्दा बढी मत पाएको छ । नेविसंघले ७२० मत पाउँदा अनेरास्ववियुले ५३१, अखिल क्रान्तिकारी ३८६ र नेपाल क्रान्तिकारी विद्यार्थी संघले ३५ मत प्राप्त गरेका छन् । ४ हजार १ सय २२ मतदाता मध्ये १ हजार ६ सय ९१ जनाले मतदान गरेका थिए । यस क्षेत्रको ठूलो र पुरानो क्याम्पस भएकाले पनि यहाँको निर्वाचनलाई चासोका साथ हेरिएको थियो ।