दाङ तुलसीपुरस्थित राप्ती बबई क्याम्पसमा नेविसंघको आधिकारिक उम्मेदवार प्रमोद भण्डारी नेतृत्वको समूहलाई बनाइएको छ । स्ववियु चुनावका लागि नेविसंघको असन्तुष्ट पक्षले पनि समानान्तररुपमा उम्मेदवारी दर्ता गराएपछि नेपाली कांग्रेसले तोकेको संयन्त्रले भण्डारी नेतृत्वको समूह नै आधिकारिक उम्मेदवार रहेको निर्णय गरेको हो ।

नेपाली कांग्रेस केन्द्रिय कार्यालयबाट खटेर आएका सह-महामन्त्री उमाकान्त चौधरीको प्रमुख आतिथ्यता एवम् केन्द्रिय सदस्य गेहेन्द्र गिरीको विशिष्ट आतिथ्यतामा बसेको संयन्त्र बैठकले भण्डारी नेतृत्वको समूहलाई नै नेविसंघको आधिकारिक उम्मेदवार बनाउने निर्णय गरेको नेपाली कांग्रेस दाङ क्षेत्र नम्बर ३(१) का सभापति देबेन्द्र रिजालले बताए । भण्डारी नेविसंघका जिल्ला सदस्य हुन् ।

राप्ती बबईमा उम्मेदवारहरुको आधिकारिकता विवाद भएपछि चौधरी विवाद मिलाउन दाङ आएका हुन् । पार्टीले तोकेको संयन्त्रले गत फागुन २५ गते नै भण्डारीको नेतृत्वमा उम्मेदवारी तय गरेको थियो । विवाद मिलाउन बसेको संयन्त्रको संयुक्त बैठकमा लुम्बिनी प्रदेशका पूर्व माननीय शंकर गिरी, नेपाली कांग्रेसका जिल्ला उपसभापति गिरिराज सुवेदी, क्षेत्र नम्बर ३ का क्षेत्रीय सभापति जगतबहादुर खड्का, नेविसंघ जिल्ला अध्यक्ष कुलराज पोख्रेल लगायत उपस्थित थिए । बैठकले पार्टीका सबै तह र तप्कालाई परिचालन गर्दै भण्डारी नेतृत्वको समूहलाई विजयी गराउन आवश्यक पहल गर्ने निर्णय पनि गरेको छ । राप्ती बबईमा नेविसंघ र अखिल क्रान्तिकारीबीच गठबन्धन छ ।

राप्ती बबई क्याम्पसमा चैत ७ गते स्ववियु निर्वाचन हुँदैछ । चैत ४ गते शनिवार क्याम्पसको निर्वाचन कार्यालयमा नेविसंघ र क्याम्पस प्रशासनमा अनेरास्ववियूले ताला लगाएपछि चैत ५ गते हुने स्ववियु निर्वाचन स्थगित भएको थियो । आइतवार क्याम्पस प्रशाासन, विद्यार्थी संगठनका प्रतिनिधि, क्याम्पस व्यवस्थापन समिति तथा राजनीतिक दलका प्रतिनिधिहरुबीच भएको छलफलमा सहमति जुटेपछि चैत ७ गते चुनाव गर्ने निर्णय भएको निर्वाचन अधिकृत टेकन प्रसाद कँडेलले जानकारी दिए ।