कोभिड, दादुरा विरुद्धको खोप, विभिन्न नियमित खोप तथा हात्तीपाइलेलगायत अन्य औषधी सेवनमा नेपालगञ्ज उपमहानगर जिल्लाका अन्य पालिकाभन्दा निकै पछाडि रहेको पाइएको छ । खोप लगाउने र औषधि सेवनको सवालमा नेपालगञ्ज पछाडि पर्नुको कारण पत्ता लगाउन यहाँ घरदैलो सर्वेक्षण शुरु गरिएको हो ।
नेपालगञ्ज उपमहानगरपालिकाले बालबालिकाले खोप लगाए नलगाएको बुझ्न र खोप लगाएका छैनन् भने लगाउन तथा नलगाउनुभएको कारण पत्ता लगाउन अनुसन्धान गर्न महिला स्वास्थ्य स्वयंसेविका र स्वास्थ्यकर्मीलाई घरघरमा पठाएर सर्वेक्षण शुरु गरेको नेपालगञ्ज उपमहानगरपालिकाको स्वास्थ्य महाशाखाले जनाएको छ ।
उपमहानगरका २३ वटै वडामा सर्वेक्षण अभियान सुरु गरिएको जनाउँदै उपमहानगरपालिकाको स्वास्थ्य महाशाखाका जनस्वास्थ्य निरीक्षक जागेश्वर बस्नेतले यहाँका धेरै रैथाने बालबालिका खोपमा छुटेको पाइएपछि यस्तो अभियान र सर्वेक्षण थालिएको बताए । उनका अनुसार उपमहानगरपालिकाले १६ महिनादेखि ५९ महिनाका बालबालिकाले खोप लगाएको/नलगाएको सर्वेक्षणसँगै खोप लगाउने अभियान पनि थालेको हो ।
नेपालगञ्ज उपमहानगरको स्वास्थ्य महाशाखाका प्रमुख राम बहादुर चन्दले वैशाखमा गर्ने पूर्ण खोप सुनिश्चितता तथा दिगोपन घोषणाका लागि कोही पनि बालबालिका खोपबाट वञ्चित नहुने भन्ने उद्देश्यकासाथ घरदैलो अभियान र सर्वेक्षण थालेको बताए ।
नेपाल सरकारले दादुरा रुबेला, बिसीजी, जेई, टाइफाइड, पीसीभी, पोलियो, टिडी, डिपिटी हेब्बी हिवलगायतका खोप दिनेगर्छ । जन्मदेखि १५ महिनाभित्र यी खोपहरू लगाइन्छ ।
नेपालगञ्ज उपमहानगरपालिकाले यो अवधिमा खोप लगाएको वा नलगाएको बुझ्न १६ देखि ५९ महिनाका बालबालिकाको सर्वेक्षण गर्दैछ । स्वास्थ्य महाशाखाका अनुसार सर्वेक्षणलाई सफल बनाउन अहिले नगरका विभिन्न वडामा अभिमुखीकरण भइरहेका छन् ।
नेपालगञ्ज उपमहानगरपालिकाले फाराम नै दिएर स्वास्थ्यकर्मीलाई घरघरमा पठाएको छ । यो सर्वेक्षणपछि यहाँ कति बालबालिका छन् र कतिले खोप लगाएका छन् भन्ने यकिन हुने छ ।
नेपालगञ्जमा खोप नै नलगाउने र लगाएका पनि धेरैले बीचैमा छोड्ने गरेको पाइएको बाँकेका खोप फोकल पर्सन नरेश श्रेष्ठले जानकारी दिए ।
