नेपालगन्ज विमानस्थलमा शुक्रवार काल्पनिक विमान दुर्घटना तथा उद्धार प्रतिकार्य अभ्यास भएको छ ।
नेपालगन्ज विमानस्थलमा दुर्घटनाबाट हुने क्षति न्यूनीकरण र सरोकार भएका निकायको समन्वयलाई प्रभावकारी तुल्याउने उद्देश्यले काल्पनिक विमान दुर्घटना तथा उद्दार प्रतिकार्य अभ्यास गरिएको हो ।
नेपालगन्ज विमानस्थलले दिएको जानकारी अनुसार, विमान दुर्घटना हुँदा गरिनुपर्ने छिटो छरितो उद्दार, क्षती न्यूनीकरण र प्रतिकार्यको काम कसरी गर्ने भन्ने विषयलाई प्राथमिकतमा राखेर कृत्रिम घटना अभ्यास गर्ने गरिएको छ ।
नेपालगन्ज विमानस्थलका प्रमुख सुरेश खनालले विमानस्थाल प्रमाणीकरणका लागि दुई/दुई वर्षमा सो कृत्रिम अभ्यास हुने उल्लेख गर्दै त्यसले विमानस्थलको महत्व बढ्ने विश्वास व्यक्त गरे ।
अभ्यासमा नेपाली सेना, नेपाल प्रहरी, नेपाल प्रहरी अस्पताल, सशस्त्र प्रहरी, नागरिक उड्डयनका पदाधिकारी, नेपाल रेडक्रस सोसाइटी बाँकेका पदाधिकारी लगायतको सहभागिता रहेको थियो ।
विमान दुर्घटनाको कृत्रिम घटना अभ्यासका क्रममा नेपाल रेडक्रस सोसाइटीद्वारा घाइतेहरुलाई प्राथमिक उपचार सेवा प्रदान गरिएको थियो ।
नागरिक उड्डयन कार्यालय नेपालगन्जको आयोजनामा भएको उक्त आपत्कालीन कृत्रिम घटना अभ्यास स्थानीय समयानुसार १०ः४५ बजे लिमा एयरको एमए–६० मुनका विमानस्थलबाट साकेत विमानस्थलको लागि उडान भएको लिमा–०११ वायुयान साकेतस्थलको क्षेत्रमा ११ः०५ बजे दुर्घटना भएको थियो ।
उक्त विमानमा ६० जना सवार थिए जस मध्ये १५ जनाको मृत्यु ९ जना गम्भीर घाइते र २२ जना सामान्य घाइते भएको परिदृष्य प्रस्तुत गरिएको थियो ।
घाइतेलाई नेपाल रेडक्रस सोसाइटीका प्राथमिक उपचार स्वयंसेवक, भेरी अस्पताल, मेडिकल कलेज, नेपाली सेना र नेपाल प्रहरीका स्वास्थ्यकर्मीहले घाइतेको प्राथमिकीकरण र प्राथमिक उपचार गरी अस्पताल पठाइएका थिए ।
नेपालगन्ज विमानस्थलमा दुई वर्षअघि पनि यस्तो कृत्रिम अभ्यास भएको थियो । प्रमुख खनालका अनुसार, काठमाडौँ, पोखरा, भैरहवा, विराटनगर र नेपालगन्ज विमानस्थल प्रमाणीकरण भएको जानकारी दिए ।
