लुम्बिनीको राष्ट्रियसभा सदस्य उपनिर्वाचनको मतदान दाङको घोराहीस्थित कर्मचारी मिलन केन्द्रमा  आज बिहान १० बजेदेखि सुरु भएको छ। 

राष्ट्रियसभा सदस्य उपनिर्वाचनमा पहिलो मतदान लुम्बिनी प्रदेशका मन्त्री चेतनारायण आचार्यले गरेका छन् । अहिले मतदान जारी छ । मतदानका लागि १० देखि अपराह्न ३ बजेसम्मको समय तोकिएको प्रदेश निर्वाचन कार्यालय दाङले जनाएको छ। 

राष्ट्रियसभा सदस्य पदका लागि तीन जना उम्मेदवार छन् ।नेकपा एमालेबाट कुमार दसौदी, कांग्रेसका माधवप्रसाद आचार्य र  नागरिक उन्मुक्ति पार्टीका राजेन्द्रवीर राय राष्ट्रियसभा सदस्यका उम्मेदवार हुन् ।  एमालेबाट राष्ट्रियसभा सदस्यमा निर्वाचित रूपन्देहीका खिमलाल भट्टराईले राजीनामा दिएपछि रिक्त रहेको उक्त पदका लागि उपनिर्वाचन हुन लागेको हो । 

राष्ट्रियसभा सदस्यका लागि प्रदेशसभा सदस्य र पालिकाका प्रमुख तथा उपप्रमुखले मतदान गर्ने छन् । प्रदेशसभा सदस्य एक जनाको मतभार ४८ र स्थानीय तहका प्रमुख उपप्रमुखमध्ये हरेकको मतभार १८ हुने गर्छ । 

लुम्बिनी प्रदेशमा कुल मतदाता संख्या ३०५ जना रहेका छन् । जसमध्ये प्रदेश सांसदको संख्या ८७ र पालिका प्रमुख तथा उपप्रमुख मतदाताको संख्या २१८ जना रहेको प्रदेश निर्वाचन कार्यालय दाङले जनाएको छ । 

लुम्बिनी प्रदेशमा कांग्रेसले ४८ पालिकामा जितेको छ। एमालेले २७, माओवादीले २५, जसपाले ३, जनमोर्चा र लोसपाले २/२ तथा राप्रपा र जनता प्रगतिशीलले १/१ स्थानमा जितेका छन् भने प्रदेश सभामा एमालेले २९, कांग्रेसले २७, माओवादीले १०, राप्रपा र नागरिक उन्मुक्तिले ४/४, जसपा, लोसपा र जनमतले ३/३, जनमोर्चा र नेकपा एकीकृत समाजवादीले १/१ सिट जितेका छन् । यहाँ स्वतन्त्रबाट २ जनाले जितेका छन् । तीन जनाले जिते पनि फेरि एक जना माओवादी केन्द्रमै फर्किएका छन् ।