अफ्रिकामा वैदेशिक रोजगारीमा लैजाने भन्दै भारत पुर्याइएका १२ जना नेपाली महिलाहरुको उद्दार गरिएको छ । अफ्रिकाको इथियोपियामा वैदेशिक रोजगारीमा लैजाने भन्दै ती महिलाहरुलाई भारतको जयपुरबाट उद्दार गरिएको हो ।
महिला बेचविखन तथा ओसारपसार भइरहेको हुँदा तत्काल उद्दार गर्न नेपाल प्रहरीको मानव बेचबिखन अनुसन्धान ब्यूरोमा सूचना आएपछि नयाँ दिल्लीमा रहेको नेपाली दूतावास, भारतीय प्रहरी र नेपालस्थीत शान्ति पुनस्थार्पना केन्द्रको सहकार्यमा उनीहरूको जयपुरबाट उद्दार गरिएको नेपाल प्रहरीको मानव बेचबिखन अनुसन्धान ब्यूरोका निर्देशक प्रहरी वरिष्ठ उपरीक्षक जीवन कुमार श्रेष्ठले बताए । उद्दार गरिएका सबैलाई हिजो नै उद्धार गरी काठमाडौं ल्याइएको प्रहरीले जानकारी दिएको छ ।
जयपुरमा उद्धार गरिएकाहरु मध्येमा २० देखि ३० वर्ष उमेर समूहका २ जना, ३१ देखि ४० वर्ष उमेर समूहका ८ जना र ४१ भन्दा माथि उमेर समूहका २ जना रहेका छन् ।
इथियोपियामा रोजगारीमा लैजाने भन्दै उद्दार गरिएका महिलाहरुलाई भारत लैजाने क्रममा जोगमनी, काकडभित्ता, जमुनाह, सुनौलिलगायतका नाकाहरू प्रयोग भएको प्रहरीले बताएको छ । यस घटनामा नेपाल र भारतीय नागरिक संलग्न हुनेसक्ने भन्दै उनीहरूको पहिचान गरी खोजतलास गर्न आवश्यक अनुसन्धान भइरहेको प्रहरीले जानकारी दिएको छ ।
