कतार विश्वकप २०२२ को फाइनलमा अर्जेन्टिना प्रवेश गरेको छ । अर्जेन्टिनाले पहिलो सेमिफाइनलमा क्रोएसियामाथि ३-० गोलको सनसनीपुर्ण जित निकाल्दै विश्वकपको फाइनलको टिकट काटेको हो ।

कतारको लुसेइल रङ्गशालामा आज बिहान सम्पन्न भएको खेलको ३४औं मिनेटमा लियोनल मेस्सीले पेनाल्टीमार्फत् गोल गर्दै अर्जेन्टिनालाई सुरुवाती अग्रता दिलाएका थिए भने खेलको ३९औँ मिनेटमा जुलियन अल्भारेजले गोल गर्दै अग्रता दोब्बर बनाए । 

खेलको  ६९औँ मिनेटमा अल्भारेजको दोस्रो गोलपछि अर्जेन्टिनाले ३-० गोल अन्तरको जीत सुनिश्चित गर्‍यो । अर्जेन्टिना सन् २०१८ को विश्वकपको पहिलो चरणमा क्रोएसियासँग ३-० गोलले पराजित भएको थियो । आज बिहान सम्पन्न पहिलो सेमिफाइनलमा क्रोएसियालाई गत विश्वकपको बदला लिदै अर्जेन्टिना फाइनलमा पुगेको हो ।

क्वार्टरफाइनलमा अर्जेन्टिना र क्रोएसिया दुवै टोली पेनाल्टी सुटआउटमा विजयी हुँदै सेमिफाइनल प्रवेश गरेका थिए । अर्जेन्टिनाले नेदरल्याण्ड्सलाई र क्रोएसियाले ब्राजिललाई पराजित गर्दै सेमिफाइनलमा पुगेका थिए । 

सेमिफाइनलको दोस्रो खेल नेपाली समय अनुसार आज राति १२:४५ बजेदेखि सुरु हुनेछ । फाइनलमा अर्जेन्टिनाले फ्रान्स र मोरक्को बीचको विजेतासँग उपाधिका लागि प्रतिस्पर्धा गर्नेछ । विश्वकपमा अर्जेन्टिनाको यो छैटौँ पटकको फाइनल यात्रा हो । अर्जेन्टिना यसअघि सन् १९३०, १९७८, १९८६, १९९०, २०१४ फाइनलमा पुगेको थियो भने दुई पटक विश्वकप उपाधि जितेको छ ।