ललितपुर । ललितपुरको औद्योगिक क्षेत्रभित्र रहेको सगरमाथा अक्सिजन प्लान्टमा विस्फोट भएको छ ।
आज बिहान १० बजे अक्सिजन भर्ने क्रममा एक्कासी विस्फोट हुँदा एकजनाको मृत्यु भएको छ । विस्फोटमा परी सात जना घाइते मध्ये एकजनाको अवस्था भने गम्भीर रहेको बताइएको छ ।
घटनास्थलमा पुगेका प्रमुख जिल्ला अधिकारी घनश्याम उपाध्यायका अनुसार घाइतेहरुलाई तत्कालै उद्धार गरेर अस्पतालमा पठाएको उनले बताए । घाइतेहरुको बीएण्डबी र पाटन अस्पतालमा उपचार भइरहेको जानकारी दिए ।
उद्योग सन्चालकका अनुसार विस्फोट हुने बेलामा १० जना कार्यरत थिए । दुई जना उद्योग सन्चालकको सम्पर्कमा आएका छन् भने एक जनाको मृत्यु भइसकेको छ । सात जना घाइतेहरु अस्पतालमा छन् । गम्भीर घाइते एक जनाको खुट्टा चुँडिएको छ ।
प्रहरीका अनुसार घटनाको विस्तुत अनुसन्धान भइरहेको जानकारी दिए । विस्फोटपछि घटनास्थलको अवस्था निकै भयावह देखिन्छ । उपाध्यायका अनुसार उद्योगको छाना केही बाँकी छैन भने टाढा–टाढाका घरहरुका सिसा पनि फुटेका छन् ।
