बागलुङ, १ असोज – बागलुङ नगरपालिका–१० भकुण्डेस्थित बराहताल पर्यटकीय गन्तव्य बन्दै गएको छ ।
ऐतिहासिक तथा धार्मिक महत्व बोकेको बराहतालको अवलोकनका लागि पछिल्लो समय आन्तरिक तथा बाह्य पर्यटकको आकर्षण बढ्दै गएको छ । स्थानीयवासी सोमबहादुर थापामगरका अनुसार यहाँ बैकुण्ठ पूर्णिमामा ठूलो मेला लाग्छ । बराहतालमा असोज र जेठको पूर्णिमामा भेँडाको बलि दिएर पूजा गर्ने परम्परा छ ।
“भाकल गर्नेले अरु बेला पनि बलि दिएर पूजा गर्छन्,” थापामगरले भन्नुभयो । ताल छेउमा रहेको बराह मन्दिरमा पूजापाठ गरे मनोकांक्षा पूरा हुने जनविश्वास छ । धार्मिक आस्था राख्नेदेखि प्रकृतिप्रेमी पर्यटकका लागि बराहताल उपयुक्त गन्तव्य मानिन्छ । दैनिक सयौँ आन्तरिक पर्यटक तथा भक्तजन ताल अवलोकनका लागि पुग्ने गर्छन् ।
दुई हजार ८२६ वर्ग मिटरमा फैलिएको सो तालमा पर्यटक आकर्षित गर्न डुङ्गा सयरको व्यवस्था गरिएको छ । एक हजार ३०० मिटरको उचाइमा रहेको ताल क्षेत्रमा पुग्न सदरमुकामबाट पैदल एक घण्टामै पुग्न सकिन्छ । भकूण्डेको घरवास, भ्यूटावर र बलेवाको भैरवथान घुम्न आउने पर्यटकले तालको समेत अवलोकन गर्ने गरेको ताल संरक्षण समितिका अध्यक्ष चन्द्रबहादुर थापामगरले बताउनुभयो । समितिको पहलमा ताल संरक्षण तथा पर्यटन प्रवद्र्धनका काम भइरहेका छन् ।
ताल सरंक्षणमा संस्कृति, पर्यटन तथा नागरिक उडड्यन मन्त्रालय, सांसद विकास कोष, तत्कालीन जिल्ला भू–संरक्षण कार्यालय र गाविसकोसमेत लगानी छ । समितिले मन्दिर पुनःनिर्माण, तालको क्षेत्र विस्तार, घेराबार, पर्खाल निर्माणलगायतका काम गरिरहेको छ । “पर्यटकीय पूर्वाधारको अभाव छ । सडक र पदमार्ग स्तरीय बनाउन आवश्यक छ । पर्यटकलाई खाना र बस्नको असुविधा छ,” अध्यक्ष थापामगरले भन्नुभयो ।
बराहतालसँगै भकूण्डेमा रहेका अन्य गन्तव्यमा पर्यटक आकर्षित गर्न सडक विस्तार आवश्यक भएको वडाध्यक्ष प्रेमबहादुर थापामगर बताउनुहुन्छ । भकुण्डेलाई पर्यटकीय गाउँको रुपमा विकास गर्न एकीकृत योजना बनाउन लागिएको छ । घरवास, भ्यूटावर, बराहताल, बराह मन्दिर, कुथुकर्मको लेक, बागलुङ सङ्ग्रहालय र भैरब मन्दिर यहाँका पर्यटकीय गन्तव्य हुन् । विसं २०६८ मा शुरु भएको घरवास पर्यटन प्रवद्र्धनले पर्यटक आकर्षित गर्न टेवा पु¥याएको छ ।
मुलाबारीमा रहेको भ्यूटावरमा सूर्योदय, सूर्यास्त र हिमशृङ्खला अवलोकन गर्न पर्यटक पुग्ने गरेका छन् । समुद्री सतहदेखि दुई हजार तीन सय मिटरको उचाइमा निर्मित भ्यूटावरबाट विभिन्न हिमालको अवलोकन गर्न सकिन्छ ।
