नेत्रविक्रम चन्द विप्लव नेतृत्वकाे माअाेवादीले बुधबार राती बाँकेकाे नेपालगंजमा रहेकाे भारतीय एक नीजि कन्स्ट्रक्सनमाथि अाक्रमण गरेकाे छ ।विप्लव माओवादी निकट राष्ट्रिय युवा जनस्वयमसेवकले बाँकेकाे नेपालगन्जस्थित भारतीय ठेकेदार रहेकाे पप्पु कन्स्ट्रक्सनमाथि अाक्रमण गरेकाे हाे ।
नेपालगंज जमुनाह राँझा सडकखण्ड निर्माणको जिम्मेवारी पाएको पप्पु कन्सट्क्सनले गुणस्तरहीन काम गरेको भन्दै जनस्वयंसेवक भेरी ब्यूरोले बुधबार मध्यरातमा कम्पनीको निर्माण उपकरणमा आगजनी गरेको बताइएकाे छ ।
अाक्रमणपछि जनस्यमसेवक ब्युराेद्धारा छरिएकाे पर्चामा पप्पु कन्स्ट्रक्सनले समयमा काम नगरेको, गुणस्तरहीन काम गरेको, गुणस्तरहीन कामलाई ढाकछोप गर्नको लागि राजनीतिक दललाई रात्रिभोज दिएको, सरकारी निकाय, दल, प्राविधिक, इन्जिनियर र गुण्डालाई सडक हस्तान्तरणको लागि पहल गरेको लगायत उल्लेख छ ।
कार्यालयको सुरक्षाको लागि खटिएका चौकिदार रामकृष्ण चौधरीले एक्कासी १ बजेतिर आगो लागेको मात्र देखेको बताएका छन् ।
अाक्रमणपछि पप्पु कन्स्ट्रक्सनका संञ्चालक हरी नारायण रौनियारले सडकमा भएका त्रुटी सच्याउने क्रम सुरु भएको तर एक्कासी आक्रमण हुनु र त्यसबाट प्राविधिक उपकरणमा तोडफोड हुनु निन्दनीय काम भएको बताए ।
नेपालगन्जमा भएकाे याे अाक्रमणअघि मंगलबार राती ९ बजे विप्लव माओवादीले चितवनको शक्तिखोरस्थित कोलार चुनखानी कार्यालय र खानीमा प्रयोग गरिएको डोजर तोडफोड र आगजनी गरेको थियो ।
अर्काे दिन बुधबार दिउँसाे मकवानपुरकाे हेटाैडामा सडक डिभिजन कार्यालय प्रमुखलार्इ पनि विप्लव माअाेवादीले कालाेमाेसाे दलेकाे थियाे ।
