बाँके । बाँकेको कोहलपुर नगरपालिकाको मेयरमा नेपाली कांग्रेसका पूर्णप्रसाद आचार्य निर्वाचित भएका छन् । ३५ वर्षीय आचार्य १४ हजार एक सय ३४ मतका साथ निर्वाचित भएका हुन् ।
आचार्यका प्रतिस्पर्धी नेकपा एमालेका खिलप्रसाद भुसालले १२ हजार दुई सय ५ र नेकपा माओवादी केन्द्रका उम्मेदवार नरेन्द्र न्यौपानेले ९ हजार ७२५ मत पाए ।
यसैगरी नगरपालिकाको उपमेयरमा पनि नेपाली कांग्रेसकै संगीता सुवेदी १४ हजार ७३ मत प्राप्त गरी विजयी भएका छन् । उनका प्रतिस्पर्धी एमालेकी अस्मिताकुमारी थारुले १३ हजार ५ सय १७ र नेकपा एकीकृत समाजवादीकी नारायणी वलीले पाँच हजार ४२ मत प्राप्त गरे ।
यसअघि ७० वर्षीय लुटबहादुर रावत नगरपालिकाको मेयर थिए । रावत २०४९ र २०५४ मा साविक कोहलपुर गाविसको अध्यक्ष पनि भएका थिए । एमालेको किल्लाको रूपमा रहेको कोहलपुरमा नेपाली कांग्रेसका तर्फबाट ३५ वर्षीय युवा उम्मेदवार आचार्यले सफलता प्राप्त गरेका हुन् ।
