नोपालगञ्ज । नेपालगञ्ज उपमहानगरको मेयरमा गठबन्धनका उम्मेदवार जित नजिक पुगेका छन् । गठबन्धनबाट नेपाली कांग्रेसका साझा प्रशान्त विष्ट जित नजिक पुगेका हुन् ।
यहाँका २३ वडामध्ये १८ वडाको मतगणना सकिँदासम्म विष्ट १६५५९ मतका साथ अगाडि छन् भने उनका प्रतिद्वन्द्वी नेकपा एमालेका पशुपतिदयाल मिश्रले जम्मा ८०५० मत प्राप्त गरेका छन् ।
यो नतिजा अनुसार कांग्रेसका विष्ट एमालेका मिश्रभन्दा ८५०९ मतान्तरले अगाडि हो । राप्रपाका नन्दलाल बैश्यले ६३८५ मतका तेस्रो स्थानमा छन् ।
त्यस्तै, उपमेयरमा गठबन्धनबाट जसपाका कमरुद्दिन राई १२५४३ मतका साथ अगाडि छन् । यहाँ राप्रपाकी विन्दु चर्ती मगर ८४३१ मतका साथ दोस्रो स्थानमा छिन्। राई र मगर बीचको मतान्तर ४१२२ रहेको छ । उपमेयरमा एमालेकी शान्तिदेवी ढकालले ७४०१ मत प्राप्त गरेकी छिन् ।
अहिले नेपालगञ्जका वडा नम्बर १२, १३, १५ र १६ को मतगणना जारी छ । १४ नम्बरको मतगणना सुरू भएको छैन । गणना भइरहेकामध्ये १२, १३ र १६ नम्बर वडाहरू यसअघि नेपाली कांग्रेसले जितेका वडाहरू हुन् ।
त्यस्तै, वडा नं. १४ भने यसअघि नेकपा एमालेले जितेको क्षेत्र हो । वडा नम्बर १, २, ३, ४, ५, ६, ७, ८, ९, १०, ११, १७, १८, १९, २०, २१, २२ र २३ को मतगणना सकिएको छ ।
विष्ट निकटतम प्रतिस्पर्धीभन्दा धेरैको मतान्तर रहेको हुँदा उनको जित निश्चित जस्तै भइसकेको बताइएको छ । नेपालगञ्जमा कुल ८१७९४ मतदाता रहेकोमा ६१२०५ मत खसेको थियो ।
