काठमाडौं। पाँच दलीय गठबन्धनमा महानगर र उपमहानगरमा भागबण्डाको टुंगो लागे पनि नेपाली कांग्रेसभित्र असन्तुष्टि कायमै छ ।

पोखरा, भरतपुर, हेटौंडा, मधेस तथा विराटनगरमा कांग्रेसका पदाधिकारी र कार्यकर्ताले भागबण्डाप्रति असन्तुष्टि जनाएका हुन् ।

पोखरा महानगरपालिकाको मेयरको पद गठबन्धनको तर्फबाट एकीकृत समाजवादीको कोटामा परेको छ । तर मेयर पद नपाएपछि कांग्रेसका असन्तुष्ट पदाधिकारी र कार्यकर्ताले कांग्रेस कास्कीको पार्टी कार्यालयमा ताला लगाएका छन् । पार्टी कार्यकताको भावनाविपरीत कांग्रेस एक्लै लड्दा पनि जितिने पोखरा महानगरको मेयर अरू पार्टीलाई दिएकोले ताला लगाइएको उनीहरुले बताएका छन् ।

यस्तै, चितवनमा पनि मेयर पद माओवादीलाई दिएर उपमेयर कांग्रेसले लिने सहमति भएको छ । तर गठबन्धनको उत्त निर्णयप्रति भरतपुर कांग्रेसको असन्तुष्टि कायमै छ । कार्यकर्ताको असन्तुष्टि साम्य पार्न पार्टी सभापति शेरबहादुर देउवाले पार्टी केन्द्रीय सदस्य एवं राज्यमन्त्री उमेश श्रेष्ठलाई हिजो चितवन पठाएको छ ।

विराटनगरको मेयर कांग्रेसलाई दिने निर्णय भए पनि उपमेयर जसपालाई दिने विषयमा कार्यकर्ता असन्तुष्ट छन् । मेयर र उपमेयर एक्लै चुनाव लड्ने निर्णय गरेर कांग्रेसको स्थानीय समितिले यसअघि सम्भावित उम्मेदवारको नाम सिफारिस गरिसकेको छ ।
महानगर समितिले यसअघि विराटनगरभित्र कोहीसँग पनि चुनावी तालमेल नगर्ने निर्णय गर्दै मेयर तथा उपमेयरका आकांक्षीमध्येबाट नाम पार्टीको केन्द्रीय समितिलाई सिफारिस गरिसकेको थियो ।

यस्तै हेटौंडा उपमहानगरपालिकामा मेयर नपाए एक्लै चुनावी प्रतिस्पर्धामा उत्रने त्यहाँका कांग्रेस नेता कार्यकर्ताले चेतावनी दिएका छन् । केन्द्रीय गठबन्धनमा हेटौंडा उपमहानगर एकीकृत समाजवादीलाई दिने सहमति भएपछि हेटौंडा कांग्रेस असन्तुष्ट भएको हो ।
कांग्रेस हेटौंडा उपमहानगर समितिले हिजो पत्रकार सम्मेलन गर्दै मेयर समाजवादीलाई छाड्ने नसक्ने जनाएको छ ।

मधेस प्रदेशमा जसपाका तर्फबाट वीरगन्ज महानगरपालिका, जनकपुर उपमहानगरपालिका र कलैया उपमहानगरपालिकामा प्रमुख पदमा उम्मेदवार दिने गठबन्धनको सहमति भएको छ ।
यसबाट मधेशका कांग्रेस नेता कार्यकर्ता असन्तुष्ट बनेका छन् । वीरगन्जको मेयर जसपालाई दिने गठबन्धनको निर्णयमाथि पुनर्विचार गर्न पर्साका कांग्रेस नेताहरूले आग्रह गरेका छन् ।

यस्तै, दाङको तुलसीपुर उपमहानगरपालिकाको नेतृत्व कांग्रेसलाई र घोराही उपमहानगरपालिकाको नेतृत्व माओवादी केन्द्रलाई परेको छ । कांग्रेस घोराही नगर समितिले भने यो भागबण्डाको विरोध गरेको छ ।  – अखबारटुडे